خضار الشتاء..هتشتري ايه؟

جهزي طلباتك للموسم واعرفي هتجيبي ايه؟

في شهور الشتاء الباردة، لما كل اللي حوالينا بيعاني من دور برد، مهم جداً إنك تهتمي بالأكل وبصحتك، وهنا ييجي دور الخضروات الشتوية؛ الخضروات اللي موسمها في الشتاء حتى لو بتظهر في الصيف بتكون في أفضل حالاتها في وقت الشتاء، لإنها بتكون مليانة بالنكهات والفيتامينات والمعادن.

وإنت بتختاري، دوري على الخضروات الطازة بحيث طعمها يكون أحلى وتكون مغذية أكثر، وخلي بالك ان الأسواق الموجودة في الشوارع غالبًا بتكون أماكن كويسة جداً للخضار الطازة وبتيجي من المزارع على طول وبأسعار تنافسية.

كقاعدة عامة، الخضروات الجذرية لازم تكون صلبة الملمس وشكلها يكون خالي من العيوب؛ لو شكلها كان دبلان ومكرمش يبقى بلاش تستخدميها. أما بالنسبة للخضروات الورقية زي اللفت، لازم لونها يكون أخضر وزاهي، ابعدي عن الورقيات اللي أطرافها بتكون مايلة للأصفر.

ودي بعض الخضروات الشتوية المفضلة اللي ممكن تضيفيها لأطباق الشتاء الدافية زي الشوربة بأنواعها أو الطواجن اللذيذة واليخنات:

الكرنب الأخضر

 الكرنب من الخضروات المناسبة للجو البارد في الشتاء، وده بيرجع لاحتوائه على نسبة عالية من الكربوهيدرات، اللي بتمد الجسم بالدفء والطاقة والحيوية

الكرفس

اختاري أصغر كرفس ممكن تلاقيه، لأنه لما بيكون حجمه أكبر ممكن يكون خشبي أكتر من جواه

الجزر 

الجزر بينمو في الصيف والشتاء، لكن في الشتاء بسبب برودة الجو النشويات اللي في الجزر بتتحول لسكر عشان تحافظ على المياه من انها تتجمد وده بيخلي الجزر طعمه أحلى ومسكر أكتر.

القرع

اختاري القرع اللي يكون تقيل بالنسبة لحجمه. الجلد أو القشرة الخارجية لازم تكون سميكة وصلبة وخالية من العيوب.

الفجل

اختاري الفجل يكون صغير إلى متوسط وقشرته تكون بين الأبيض والبنفسجي الناعم

البنجر

البنجر هو نوع من أنواع الخضروات الجذرية اللي بيستخدم في أكلات كتير في جميع أنحاء العالم، وهو مصدر لمجموعة متنوعة من الفيتامينات والمعادن والمركبات النباتية اللي ليها خصائص طبية.